झापा र गौरीगञ्ज जोड्ने कन्काई पुलको निर्माण ठेक्का तोडिएको छ ।
झापा गाउँपालिका-२ र गौरीगञ्ज गाउँपालिका-१ जोड्ने करिब ७२३ मिटर लम्बाइ रहेको कन्काई पुल निर्माणको ठेक्का तोडिएको हो ।सडक विभागमातहतको हुलानी राजमार्ग निर्देशनालयअन्तर्गत योजना कार्यालय इटहरीले बिहीबार पुल निर्माणका लागि पप्पु महादेव खिम्तीको संयुक्त उपक्रम ९जेभी०सँग ठेक्का सम्झौता ठेक्का अन्त्य गरिएको सार्वजनिक सूचना जारी गरेको छ ।
हुलाकी राजमार्गअन्तर्गत पर्ने यो पुल १४ वर्षदेखि अधुरो थियो ।
यस पुलको निर्माण ठेक्का २०६८ जेठ ३१ मा सम्झौता गरिएको थियो । पाँचपटक म्याद थप्दा पनि निर्माण प्रगति ५६ प्रतिशत मात्र पुगेको थियो । ठेक्का रकम करसहित ३४ करोड ९ लाख रुपैयाँ थियो र व्यवसायीको १ करोड ७१ लाख रुपैयाँ जमानत जफत हुने भएको छ ।
ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकासमन्त्री कुलमान घिसिङले गत २६ असोजमा स्थलगत निरीक्षण गरी उत्त पुल निर्माण बारे छिट्टै निर्णय गरिने स्थानीय बासिन्दालाई बताएका थिए । स्थानीयबाट पुल नहुँदा सास्ती बेहोर्नुपरेको, व्यापार–व्यवसाय तथा पर्यटन प्रवर्द्धनमा समेत असर परेकाले पुल निर्माण तत्काल सम्पन्न गर्न माग गरिएको थियो ।मन्त्री घिसिङले ठेक्का लिने तर काम नगर्ने र आयोजना अलपत्र पार्ने प्रवृत्ति अन्त्यका लागि रुग्ण ठेक्का तोड्न मातहतका निकायलाई निर्देशन दिएका थिए ।कार्यालयले गत असोजमा १५ दिनभित्र स्पष्टीकरण मागेको थियो, तर व्यवसायीको जवाफ सन्तोषजनक नहुँदा ठेक्का तोडिएको हो ।पुलका १९ स्पानमध्ये ८ वटा सकिएका छन् । बाँकी ११ मध्ये २ स्पानमा गर्डर राखिएको छ, ६ स्पानको जग हालिएको छ भने ३ स्पानको जग राख्न बाँकी छ ।
प्रतिक्रिया